طريقة الفول النابت
فول
بصلة كبيرة
4 فصوص توم
زيت ذرة
التحضير
- نجيب الفول الناشف و ننقيه كويس ونحطه في علبه
- ننقعه في ميه من الحنفيه " مش مغليه ولا سخنه " لمده يومين بس نغيره الميه اليوم التاني علشان مايعفنش....
- نصفيه كويس و نشطفه و نجيب صنيه و نحط فيها فوطه مبلوله كويس " مش منديه" و نحط فيها الفول و نغطيه بباقي الفوطه .....

و نغطيه بكيس نايلون لمده يومين برضه بس اليوم التاني نفتح عليه و لو لقينا الفوطه نشفت شويه نروح بلينها بحبه ميه علشان الفول ينبت حلو
- نشيل الفول من الفوطه و نشطفه كويس و بكده يبقي جاهز علي الطبخ..

لو مش عايزه تطبخيه يومها ممكن تشيله في التلاجه في كيس نايلون و تطبخيه تاني يوم
الطهى
طريقه طبخه

1- نجيب الفول بعد ما نشطفه كويس
- نجيب بصله كبيره و نقطعها حلقات و حوالي 4 فصوص ثوم و نقطع كل فص نصين و بعدين نجيب حله و نحط فيها شويه زيت ذره و نشوح البصل و لما يدبل نحط الثوم و نقلب ...
بعد ما يصفروا نحط عليهم الفول و نشوحه كويس بتاع 3 دقايق كده.
4 - نكون غالين ميه -انا بسخن البويلر علي ما اشوح الفول يكون غلي- و اول ما الفول يتشوح نروح حطين الميه المغليه عليه و نحطله ملح و كمون و نسيبه يستوي

تقريبا بيستوي في حوالي ربع ساعه
بس كده .... الحمد لله الفول استوي
نجيب طبق حلو كده و نغرف الفول و هو سخن مولع ... و ممكن نعصر عليه لمون بيبقي حلو قوي